- १ भाद्र २०८३, सोमबार / Aug 17, 2026
काठमाडौँ । यस वर्षको माध्यमिक शिक्षा परीक्षा (एसइई) सुरु भएको छ । आज बिहान ८ बजेदेखि सुरु भएको परीक्षा ११ बजे सकिनेछ ।
परीक्षा शान्तिपूर्ण, मर्यादित र व्यवस्थित रूपमा सम्पन्न गराउन राष्ट्रिय परीक्षा बोर्डले ७७ वटै जिल्लाका सबै जिम्मेवार निकायसँग अनलाइनमार्फत बैठक सम्पन्न गरेको थियो । देशभरका ७८ हजार भन्दा बढी जनशक्ति परिचालन गरिएको परीक्षा नियन्त्रक कार्यालयले जनाएको छ ।
देशका ७७ जिल्लामा दुई हजार ३६ परीक्षा केन्द्र र जापानमा एक गरी कूल दुई हजार ३७ वटा परीक्षा केन्द्र तोकिएको छ । यो वर्ष परीक्षा दिनका लागि कूल ४ लाख ८४ हजार २२७ जनाले फाराम भरेका थिए ।
परिक्षा नियन्त्रण कार्यालयका अनुसार परीक्षा हलभित्र कुनै पनि तस्बिर लिन नपाउने, परीक्षा केन्द्रमा अत्यन्तै सीमित, आवश्यक र तोकिएका व्यक्ति परीक्षा समितिको अनुमति लिएर मात्रै अनुगमन गर्न पाइनेछ ।
त्यस्तै परिक्षा सञ्चालनमा सञ्चारकर्मीलाई पनि केन्द्रका बाहिरको गतिविधिहरूको तस्बिर लिन पाइने छ भने परीक्षा सुरु भएपछि परीक्षा हलभित्र गएर तस्बिर लिन नपाइने बताइएको छ ।
परिक्षा आजदेखि सुरु भएर २९ गतेसम्म सञ्चालन हुनेछ ।
