- १२ आश्विन २०८३, सोमबार / Sep 28, 2026
काठमाडौं । प्रचण्ड–माधव नेपाल नेतृत्वका नेपाल कम्युनिस्ट पार्टी (नेकपा)ले केपी कदमको विरोधमा आज देशभर विरोध प्रदर्शन गर्दै छ । यता काठमाडौंको विरोध प्रदर्शनमा ५० हजारबढी कार्यकर्ताले शक्ति प्रदर्शन गर्ने जनाइएको छ ।
बिहान ११ काठमाडौंको टेकु, कुपन्डोल, नयाँबानेश्वर, लैनचौर र नक्शालबाट जुलुस सुरु हुने बताइएको छ । रत्नपार्कबाट मजदुर, त्रिचन्द्र क्याम्पस अगाडिबाट विद्यार्थी र प्रदर्शनीमार्गबाट युवाको जुलुस निकालिने नेकपाले जनाएको छ । जुलुस भृकुटीमण्डप पुगेपछि सभामा परिणत हुने र शीर्ष नेताहरुले सम्बोधन गर्ने युवा संघका अध्यक्ष रामप्रसाद सापकोटा ‘दीपशिखा’ले बताए ।
सोमबार नेपाली कांग्रेसले देशभर विरोध प्रदर्शन गरेको थियो भने उता जनता समाजवादी पार्टी, नागरिक अगुवा, विद्यार्थी र युवाहरुले पनि विरोध प्रदर्शन गरेका थिए । आज नेकपा प्रचण्ड माधव पक्षले प्रदर्शन गरिरहेका छन् । संसद विघटनविरुद्धको रिटमा सर्वोच्चमा बहस चलिरहेको बेला निर्वाचन आयोग नेकपाको आधिकारिकतालाई कसरी टुंग्याउने भन्नेमा नै तयारीमा रहेको बताइएको छ ।
