- १३ जेष्ठ २०८३, बुधबार / May 27, 2026
टीकापर । निर्माणाधीन तटबन्ध भत्किएर कर्णाली नदीमा आएको बाढी टीकापुर नगरपालिका वडा नं ५ शाहीपुर गाउँमा पसेको छ । मङ्गलबार दिउँसो बाढी गाउँमा पसेपछि स्थानीयको भागाभाग भएको छ ।
क्षति पुर्याउन सक्ने भन्दै गाउँका मानिसलाई माइकिङ गरेर घर छोड्न लगाइएको टीकापुर नगरपालिकाले जनाएको छ । शाहीपुरका स्थानीय नारायण चौधरीले बोक्न सकिने कागजात र सामान लिएर घर छोडिरहेको र राष्ट्रिय माबि बसन्तामा बस्न लागेको जानकारी दिए ।
नदी फुटेका कारण दक्षिणका तल्लो शाहीपुर, सिम्रनी, सत्ती, बनगाँऊ, बटनपुर लगायतका बस्ती प्रभावित भैरहेका छन् । ईलाका प्रहरी कार्यालय टीकापुरका प्रमुख, प्रहरी नायव उपरीक्षक प्रकाश सापकोटाले स्थानीयको सहयोगमा नेपाल प्रहरी, सशस्त्र प्रहरी लगाएर बस्तीबाट मानिसहरु उँचो स्थानतिर सार्न लागेको बताए ।
टीकापुर नगरपालिकाका प्रमुख तपेन्द्रबहादुर रावलले वडा नं २ मूलपानी, वडा नं ५ को मसानघाट लगायतका क्षेत्रमा नदी फुट्न लागेकाले दक्षिणी क्षेत्रका बासिन्दालाई घर छाड्न लगाइएको बताए ।
