- २७ श्रावण २०८३, बुधबार / Aug 12, 2026
काठमाडौं । नेपाली कांग्रेसको महामन्त्री पदको मतगणना आज सुरु गरिंदै छ । बिहानदेखि महामन्त्रीको मतगणना सुरु गर्ने तयारी भइरहेको निर्वाचन समितिले जनाएको छ ।
महामन्त्रीमा प्रकाशशरण महत, प्रदीप पौडेल, डा. मिनेन्द्र रिजाल, गगन थापा , विश्वप्रकाश शर्मा र राजाराम कार्की महामन्त्रीका उम्मेदवार छन् ।
निर्वाचनबाट दुई जना महामन्त्री चुनिने छन् । निर्वाचनबाट सभापति र उपसभापति पदको परिणाम घोषणा भइसकेकाले महामन्त्री पदको मतगणना सुरु गर्ने तयारी भइरहेको कांग्रेस निर्वाचन समितिका सचिव जगन्नाथ श्रेष्ठले बताए ।
इतिहासमा पहिलोपटक भएको उपसभापति पदको निर्वाचनबाट पूर्णबहादुर खड्का र धनराज गुरुङ निर्वाचित भएका छन् । सभापतिमा भने शेरबहादुर देउवा निर्वाचित भएका छन्।
कांग्रेसको केन्द्रीय कार्यसमितिका पदाधिकारीमध्ये एक सभापति, दुई उपसभापति, दुई महामन्त्री र आठ सहमहामन्त्रीको निर्वाचन हुने विधानमा व्यवस्था छ ।
कोषाध्यक्ष भने निर्वाचित केन्द्रीय सदस्यमध्येबाट निर्वाचित हुने व्यवस्था छ । ३५ खुला केन्द्रीय सदस्य, महिला ९, प्रत्येक प्रदेशबाट ३ जनाका दरले २१, दलित ९, आदिवासी जनजाति १५, खस आर्य १३, मधेसी ९, थारु चार, मुस्लिम ३,
पिछडिएको क्षेत्रबाट १, अल्पसंख्यकबाट १, अपाङ्गता भएकाबाट १ सदस्य गरी कूल १३४ पदाधिकारी तथा सदस्य निर्वाचनबाट चुनिने छन् । यीबाहेक केन्द्रीय सभापतिले ३३ जना मनोनित गर्ने कांग्रेसको विधानमा व्यवस्था गरिएको छ ।
