- ६ आश्विन २०८३, मंगलवार / Sep 22, 2026
काठमाडौं । भारतीय फिल्म ‘आदिपुरुष’लाई लिएर विवाद चर्किएपछि हिन्दी चलचित्र प्रदर्शनमा रोक लगाइएको छ । क्यूएफएक्स, आइएनआई, बिग मूभिज, वान सिनेमाज्सहित मल्टिप्लेक्सले शोलाई स्थगित गरेका छन् ।
फिल्म हलको छाता संस्था चलचित्र संघले मुलुकभरका सबै हललाई सर्कुलर पठाउँदै विकसित परिस्थितीको कारण सबै हलमा ‘आदिपुरुष’को शो अनिवार्य रोक्न निर्देशन दिएको हो । सोही निर्देशनको पालना गर्दै हलहरुले प्रदर्शन रोकेका छन् ।
शोमा विक्री भैसकेका टिकटको रकम फिर्ता गर्ने वा अर्को शोमा मिलाउने ब्यवस्था हलहरुले गरेका छन् । बिहीबार रातीसम्म १५ लाख रुपैयाँको टिकट विक्री भैसकेको चलचित्र विकास बोर्डको बक्सअफिस डेटाले देखिएको छ ।
यसैबीच काठमाडौं महानगरका मेयर बालेन शाहको अभिव्यक्तिपछि उत्पन्न परिस्थितीलाई लिएर चलचित्र संघले शुक्रबार बिहान आकस्मिक बैठक बोलाएको छ । बैठकमा बालेनको अभिव्यक्तिबारे छलफल हुने र आदिपुरुषको प्रदर्शनलाई लिएर निर्णय हुने जनाइएको छ ।
