- १० आश्विन २०८३, शनिबार / Sep 26, 2026
काठमाडौं । अवैधरूपमा निर्माण गरिएका र सार्वजनिक जग्गा मिचेर निर्माण गरिएका सम्पूर्ण संरचना भत्काउने कार्य काठमाडौं महानगरपालिकाले सुरु गरेको छ । कामपा प्रमुख बालेन शाहको सचिवालय भन्छ, ‘यो अभियान सञ्चालन भएको छ, कामपाको ३२ वटै वडामा अवैध रूपमा निर्माण भएका संरचना बाँकी राखिदैन ।’
नक्सा पास नगरी निर्माण भएका र नक्सा पासअनुरुप निर्माण नगरिएका दुवै संरचना हटाइने भएको हो । बुधबार सुन्धरास्थित काठमाडौं मलको आसपासमा निर्माण भएका अनधिकृतरुपमा बनाइएका संरचनामा डोजर लगाएर भत्काइएको छ ।
महानगर प्रमुख शाहको उपस्तिथिमा न्यूरोडस्थित आरबी कम्प्लेक्सले बनाएका अनधिकृत संरचना डोजर लगाएर भत्काइएको छ । दरबारमार्गका अनधिकृत संरचना हटाउन निर्देशन पनि दिएका छन् । यसअघि नयाँ बानेश्वर क्षेत्रमा पार्किङका लागि बनाइएका स्थानमा राखिएका पसलसमेत हटाइएका थिए ।
जारी गरेको ३५ दिने सार्वजनिक सूचनाको वेवास्ता गरेपछि बुधबारदेखि अवैध संरचना भत्काउने काम सुरू गरेको हो । उक्त कार्य सुरु गरेसँगै आगामी दिनमा पार्किङको समस्या समाधानसँगै ट्राफिक व्यवस्थापनमा सहयोग पुग्ने कामपाको विश्वास छ ।
