- ३१ जेष्ठ २०८३, आईतवार / Jun 14, 2026
काठमाडौं । कोभिड– १९ संकट व्यवस्थापन केन्द्र (सिसिएमसी) खारेज भएको छ । अब प्रधानमन्त्री तथा मन्त्रिपरिषद् कार्यालयका सचिवको नेतृत्वमा कोभिड– १९ संकट व्यवस्थापन समन्वय कमिटी (सिसिएमसिसी) गठन गरिएको छ ।
सिसिएमसी गठनसम्बन्धी अध्यादेश निष्क्रिय भएसँगै खारेज गरेर नयाँ संरचना बनाइएको हो । ५ जेठमा ल्याइएको कोभिड– १९ संकट व्यवस्थापन अध्यादेश, २०७८ अनुसार सरकारले सिसिएमसी गठन गरेको थियो । सो अध्यादेश निष्क्रिय भएसँगै सिसिएमसीको कानुनी वैधतामा प्रश्न उठेको थियो ।
सिसिएमसीको खारेजीसँगै प्रमुख कार्यकारी अधिकृत पूर्वरथी बालानन्द शर्मा पनि पदमुक्त भएका छन् । सिसिएमसिसीको संयोजक प्रधानमन्त्री कार्यालयका सचिव महेश्वर न्यौपानेलाई बनाइएको छ । यसअघि सिसिएमसीमा सुरक्षा निकायबाट विशिष्ट श्रेणीका अधिकृत खटिँदै आएकोमा हाल प्रथम श्रेणीका अधिकारीलाई खटाइएको छ ।
कोरोना संक्रमण पनि न्यून हुँदै गएकाले सिसिएमसी खारेज गरेर नयाँ संरचना बनाइएको प्रधानमन्त्री कार्यालयले जनाएको छ । सिसिएमसिसीको कार्यविधिसमेत मन्त्रिपरिषद्ले स्वीकृत गरिसकेको छ ।
संक्रामक रोग ऐन, २०२० अनुसार प्रधानमन्त्री कार्यालयका सचिवको नेतृत्वमा सिसिएमसी गठन भएको थियो । हाल संक्रामक रोग ऐनअनुसार नै फेरि प्रधानमन्त्री कार्यालयकै सचिवको नेतृत्वमा यससम्बन्धी संरचना बनाइएको छ ।
