- ३ कार्तिक २०८३, मंगलवार / Oct 20, 2026
काठमाडौँ । शिवरात्रीको अवसरमा कोरोना महामारीको जोखिमलाई ध्यानमा राख्दै शिवसवरी धाम पहरुवा दाङमा विशेष मेला लाग्ने भएको छ । विगत वर्षका महाशिवरात्रिको भन्दा विशेष तरिकामा यसवर्ष मेला आयोजना गरिएको शिवसवरी धामले जनाएको छ ।
धाम परिसरमा भक्तजन तथा सर्वसाधारणको घुइचो लाग्ने र सङ्ख्या बढ्ने भएकाले मेलालाई व्यवस्थित गर्न विशेष पहल गरिएको समितिका अध्यक्ष मिश्रलाल चौधरीले जानकारी दिए । आन्तरिक मामिला तथा कानुन मन्त्री सोनामले मेलाको उद्घाटन गर्ने जनाइएको छ ।
कोरोनाको जोखिम कायमै रहेकाले स्वास्थ्य मापदण्ड पूरा गरेर दर्शनमा आउन भक्तजनलाई आह्वान गरिएको छ । यस वर्ष स्वास्थ्य मापदण्ड पूरा गरेर लाखबढी भक्तजनलाई दर्शन गराउने धामको तयारी छ ।
देउखुरी दाङको राप्ती गाउँपालिका–५ मा अवस्थित शिवसवरी धाम पहरूवामा फागुन २७ गते महाशिवरात्रीमा आयोजना गरिएको धार्मिक मेला तथा सांस्कृतिक कार्यक्रममा राष्ट्रिय तथा स्थानीय कलाकारले विशेष प्रस्तुती राख्ने मेला तथा सांस्कृतिक कार्यक्रम मूल आयोजक समितीले जनाएको छ ।
मेलामा विभिन्न व्यापारिक तथा फलफूलका स्टलहरू समेत रहने, धाममा पुजापाठका लागि आउने र सांस्कृतिक कार्यक्रममा सहभागी हुनेहरूलाई भण्डाराको समेत व्यवस्था गरिएको अध्यक्ष मिश्रुलाल चौधरीले बताए ।
शिवरात्री पर्व नजिकिए संगै मेला तथा सांस्कृतिक कार्यक्रमको तयारी पुरा भएको समितीका महासचिव धना चौधरीले बताइन् । लुम्बिनी प्रदेशको स्थायी राजधानी राप्ती उपत्यका दाङ देउखुरी शिवसवरी धाम स्थल पहरूवामा फागुन २६, २७, र २८ गते तीन दिन सम्म धार्मिक मेला तथा सास्कृतिक कार्यक्रमलाई व्यवस्थित बनाइएको समितीका उपाध्यक्ष तथा सांस्कृितक संयोजक राजेन्द्र चौधरीले बताए ।
शिवसवरीधाम पहरूवा यसभन्दा पहिले एक करोड बढी बत्ती बालेर विश्व शान्तिको कामना गरिएको शिवजी चौधरीले जानकारी दिईन् । भक्तजनहरूको सक्रियताले १ करोड ५ लाख बत्ती बालिएको शिबजी चौधरीको भनाई छ । मेलाकाे प्रचार प्रसारलाइ व्यापक पारिएकाे प्रचार प्रसार संयाेजक सन्ताेष कुमार गुप्ताले बताए ।
