- ३१ जेष्ठ २०८३, आईतवार / Jun 14, 2026
काठमाडौं । रोयल्टी नतिर्ने क्यासिनोको लाइसेन्स खारेज गर्ने चेतावनीपछि १७ वटा कम्पनीले बक्यौता बुझाएका छन् । सोमबार सेन्ट्रल मिडिया प्रालिले पाँच करोडमध्ये चार करोड रुपैयाँ बक्यौता बुझाएसँगै ७६ करोड ४५ लाख रुपैयाँ राजस्व उठेको मन्त्रालयले जनाएको छ ।
अब एक अर्ब ११ करोड ८४ लाख ४७ हजार उठ्न बाँकी रहेको होटल तथा क्यासिनो हेर्ने अधिकृत खेमराज जोशीले बताए । मन्त्री प्रेमबहादुर आलेको निर्देशनपछि विभागले रोयल्टी नतिर्ने क्यासिनो सञ्चालकको तीनपुस्ते विवरण सार्वजनिक गरेको थियो ।
अझै ६ वटा कम्पनीले रोयल्टी नवीकरण दस्तुर बुझाउन बाँकी रहेको विभागले जनाएको छ । तीमध्ये एसएचएल म्यानेजमेन्ट सर्भिसेज प्रालिको दुईवटा होटलमा गरेर १४ करोड छ । बैंक जमानत रहेकाले असूलउपर गर्न समस्या नरहेको जोशीले बताए ।
सेन्ट्रल मिडिया प्रालिले १८ करोड ९० लाख छ । ह्याप्पी आवर प्रालि, होटल याक एण्ड यति (क्यासिनो रोयल), रक इन्टरनेशनल, ओरियन्टल होटल्ससमेत गरी जम्मा एक अर्ब ११ करोड रुपैयाँ उठ्न बाँकी रहेको छ ।
८१ करोडभन्दा बढी राजस्व नतिरी भारतमा लुकेर बसेका क्यासिनो किङ राकेश बाद्वालाई इन्टरपोल लगाएर भए पनि नेपालमा ल्याएर कानूनबमोजिम कारबाही गर्ने मन्त्री आलेले चेतावनी दिएका छन् ।
