खोल्सामा सुमो खस्दा सुमोमा सवार १३ जना घाइते

काठमाडौं । टाटा सुमो दुर्घटना हुँदा मकवानपुरको इन्द्रसरोबरमा १३ जना घाइते भएका छन्। ​मंगलबार बिहान भएको दुर्घटनामा घाइते हुने १२ जना भारतीय नागरिक रहेका छन्। उनीहरुलाई उद्धार गरी उपचारको लागी काठमाडौं पठाइएको मकवानपुर प्रहरीले जनाएको छ ।

घाइते हुनेमा सुमो चालक बारा जिल्लाको कलैया नगरपालिका– २१ का २५ वर्षीय अनिल कुमार शाह र १२ जना भारतीय रहेको जनाएको छ । इन्द्रसरोबर गाउँपालिकाको वडा नम्बर ५ मकैबारीमा बिहान सुमो दुर्घटना भएको मकवानपुर प्रहरीले जनाएको छ।

मकवानपुरको कुलेखानी मातातिर्थ हुँदै वीरगंजबाट काठमाडौंतर्फ जादैँ गरेको मधेश प्रदेश ०३–०० १ ज ०२८३ नम्बरको सुमो आफै अनियन्त्रित भई सडकबाट अन्दाजी २० मिटर तल खोल्सामा खस्दा सुमोमा सवार १३ जना घाइते भएका हुन्।