- १३ असार २०८३, शनिबार / Jun 27, 2026
दार्चुला । सीमानाका टिंकर अहिले सुरक्षाकर्मीविहीन बनेको छ । भारी हिमपातका कारण कार्तिक पहिलो सातादेखि सुरक्षाकर्मी छाङरु झरेपछि नाका सुरक्षाकर्मी विहीन भएको हो ।
हिउँका कारण १२ किलोमिटर तल छाङरु झरेका प्रहरी हालसम्म सो क्षेत्रमा नखटिएको दार्चुलाका प्रमुख जिल्ला अधिकारी दीर्घराज उपाध्यायले बताए । टिंकरका बासिन्दाहरू पनि हिउँद छल्न असोजमै दार्चुला सदरमुकाम खलंगा झरेपछि फर्किएका छैनन् ।
चैत महिनाबाट हिउँ पग्लिने भएपछि यो क्षेत्र अहिले मानवविहीन भएको छ । गाउँबाट दुई किलोमिटर माथिल्लो क्षेत्र टिंकरमा सशस्त्र प्रहरीको बिओपी भवन निर्माण गरिएको छ । गत भदौ महिनामा निर्माण सम्पन्न भएको भवनमा सशस्त्र प्रहरी बस्न सकेको छैन ।
बिओपीको दुइ भवन ब्लकसँगै भान्सा र शौचालय निर्माण गरिएको छ । टिंकर सीमा प्रहरी चौकीनजिकै बनाइएको बिओपीको भवन टिंकर भन्सारको छियालेक क्षेत्रको जमिनमा छ ।
चार पाँच घण्टा उकालो पैदल यात्रा गरेपछि नेपाल र चीन सीमाना छुट्याउने टिंकर भञ्ज्याङको १ नम्बर पिलर पुगिन्छ । तर टिंकरमा निर्माण भएको बिओपीमा सुरक्षाकर्मी राख्न माथिबाट कुनै निर्देशन नभएको सशस्त्र प्रहरी बल नेपाल ४४ नम्बर गण दार्चुलाका गणपति एसपी त्रिभुवन विष्टले बताए ।
