ठुलो परिमाणको गाँजासहित धरानबाट दुई जना पक्राउ

सुनसरी । सुनसरीको धरान उपमहानगरपालिकामा ठुलो परिमाणको गाँजासहित दुई जनालाई सशस्त्र प्रहरीले पक्राउ गरेको छ । सशस्त्र प्रहरी बल बेस क्याम्प धरानको टोलीले २ सय २७ केजी गाँजासहित धनकुटाका चन्द्र थापा र तेह्रथुमका चुडामणि कटवाललाई बिहीबार पक्राउ गरेको हो ।

धरानको शिवधारामा सवारी जाँचका क्रममा गाँजासहित उनीहरुलाई नियन्त्रणमा लिइएको जनाइएको छ । बरामद गाँजा, ट्रक र तस्करीमा संलग्न दुवै जनालाई आवश्यक कार्बाहीका लागि इलाका प्रहरी कार्यालय धरानमा बुझाइएको छ । धनकुटाबाट धरानतर्फ आउँदै गरेको प्रदेश १–०२००१ ख ९४८९ नम्बरको ट्रकमा ल्याउँदै गरेको २ सय २७ केजी गाँजा र नगद ६० हजार बरामद गरिएको सुनसरी सशस्त्र प्रहरीले जनाएको छ ।