- २९ भाद्र २०८३, सोमबार / Sep 14, 2026
जुम्ला । तिला गाउँपालिका–३ कुडारी सार्कीवाडा गाउँमा गएराति आगलागी हुँदा चार बालबालिकाको मृत्यु भएको छ। आगलागीबाट मानसिं सार्कीका दुई छोरी, छोरा र भान्जीको मृत्यु भएको हो ।
११ वर्षीया अनु र तीन वर्षीया दर्शना तथा एक वर्षीय छोरा दीपेश र भान्जी १४ वर्षीया तिर्सना सार्कीको मृत्यु भएको जिल्ला प्रहरी कार्यालय जुम्लाले जनाएको छ । आगलागीबारे राति पौने १२ बजे प्रहरीलाई जानकारी भएको प्रहरी प्रमुख नायब उपरीक्षक नरेन्द्र चन्दले बताए ।
उनले भने, ‘सूचना पाउनेबित्तिकै जिल्लाबाट प्रमुख जिल्ला अधिकारी विजयाकुमारी प्रसाईसहितको टोलीले त्यहाँ पुगेर आगो नियन्त्रणमा लियो।’ आगलागीको कारण बेहोस भएका मानसिं र उनकी श्रीमती फागुनी तथा बहिनी रुन्चकलीलाई उपाचारका लागि कर्णाली स्वास्थ्य विज्ञान प्रतिष्ठानमा लगिएको छ ।
मृतक चारै बालबालिकाको शव परीक्षणका लागि प्रतिष्ठानमा लगिएको प्रहरीको भनाइ छ। आगलागीबाट घरको दोस्रो र तेस्रो तलामा पूर्णरूपले क्षति भएको छ । घटनाबारे थप अनुसन्धान भइरहेको चन्दले बताए ।
