- २७ श्रावण २०८३, बुधबार / Aug 12, 2026
काठमाडौं । रुसले सैनिक संख्या १० प्रतिशतले बढाउने भएको छ । ६ महिनादेखि युक्रेन युद्धमा फसेको रुसले हाल कायम सैनिक संख्याको १० प्रतिशत नयाँ भर्ति गर्ने भएको हो । यस आदेशमा रुसी राष्ट्रपति भ्लादिमिर पुटिनले हस्ताक्षर समेत गरेका छन् ।
नियमित सैनिक संख्या बढाएसँगै स्वयंसेवक सैनिकतर्फ पनि नयाँ भर्ति गर्न सकिने बताइएको छ । नयाँ सैनिक भर्तिपछि नियमिति सेना र स्वयंसेवक सेना गरी रुससँग कुल सैनिक संख्या २० लाख ४० हजार हुनेछ । रुसले युक्रेनको विशेष कारबाहीमा स्वयंसेवक सेना मात्रै क्रियाशील रहेको दावी समेत गर्दै आएको छ ।
हाल रुससँग ११ लाख ५० हजार नियमित सैनिक रहेकोमा १ लाख ३७ हजार नयाँ भर्ति गरिने भएको छ । राष्ट्रपति पुटिनको आदेश आगामी जनावरिदेखि कार्यान्वयनमा जाने जनाइएको छ । पश्चिमा विश्लेषक तथा संचार माध्यमहरुले युक्रेन युद्धमा ठूलो सैन्य क्षति भएकाले त्यसको स्थानमा नयाँ भर्ति गर्न खोजेको आशंका गरेका छन् ।
रुसमा १८ वर्षदेखि २७ वर्ष उमेर समूहका हरेक पुरुषले कम्तिमा एक वर्ष सैन्य सेवामा काम गर्नुपर्दछ । रुसी संचार माध्यम तथा गैरसरकारी संस्थाहरुले भने निजी सुरक्षा कम्पनीहरुसँग रहेको जनशक्ति तथा अन्य सुरक्षा सम्बद्ध स्वयंसेवकहरुलाई युक्रेन युद्धमा आकर्षित गर्ने नीति लिइएको हुनसक्ने बताएका छन् । साथै युक्रेन युद्धमा जानेहरुलाई कैद माफ गर्ने गरी कैदी बन्दीहरुलाई पनि भर्ति गर्न सकिने आंकलन समेत गरिएको छ ।
