नागरिकता माग गर्दै एक युवकद्धारा माइतीघरमा आत्मदाह प्रयास

काठमाडौं । नागरिकता माग गर्दै एक युवकले आत्मदाहको प्रयास गरेका छन् । अदालतले नागरिकता विधेयक कार्यान्वयनमा रोक लगाएपछि नागरिकताविहीन संघर्ष समितिले माइतीघरमा निरन्तर प्रदर्शन गर्दै आएको छ । त्यस क्रममा एक युवकले आफैंलाई पेट्रोल खन्याएर आत्मदाह गर्ने प्रयास गरेका छन् ।

जिल्ला प्रहरी परिसरका प्रवक्ता एसपी सीताराम रिजालका अनुसार आत्मदाह प्रयास गर्नेमा मोरङ कटहरीका निरजकुमार कामत रहेका छन् । १८ वर्ष पुगेपछि नागरिकता लिने प्रयास गरेका निरज पछिल्लो पाँच वर्षदेखि नागरिकताका लागि आन्दोलनरत छन् ।

उनका हजुरबुबा र बुबाले जन्मको आधारमा नेपाली नागरिकता लिएका थिए । उनका बाबुले २०६४ मा जन्मको आधारमा नेपाली नागरिकता लिएका थिए । पेट्रोल खन्याउँदा खन्याउँदै प्रहरीले उनलाई रोकेको थियो । अहिले उपचारका लागि राष्ट्रिय ट्रमा सेन्टर पठाइएको एसपी रिजालले बताए ।