निषेधाज्ञा अझै लम्ब्याउन स्वास्थ्य मन्त्रालयको माग

काठमाडौं । कोरोना संक्रमण दर झन झन बढेको भन्दै स्वास्थ्य तथा जनसंख्या मन्त्रालयले उपत्यकामा निषेधाज्ञा थप एक साता लम्ब्याउन माग गरेको छ ।

विगत तीन सातादेखि जारी लकडाउन आज राति १२ बजेदेखि सकिदै छ । लकडाउन लम्ब्याए महामारी नियन्त्रण गर्न सहज हुने भन्दै स्वास्थ्य मन्त्रालयले एक साता लम्ब्याउन माग गरेको हो । दुई सय बढी एक्टिभ केस भएका ठाउँमा लकडाउन र पाँच सय बढी एक्टिभ केस भएका ठाउँमा कर्फ्यु नै लगाउने भन्ने स्वास्थ्यको मापदण्डअनुसार चल्नुपर्ने मन्त्रालयका प्रमुख विशेषज्ञ महेन्द्रप्रसाद श्रेष्ठले बताए ।

पूर्ण रुपमा लकडाउन खोलिदिँदा अस्पताल र चिकित्सकहरुलाई संक्रमित व्यवस्थापन गर्न गाह्रो हुने, अस्पतालमा ठाउँको अभाव हुने मन्त्रालयको ठहर छ ।