नेकपा विवाद प्रदेश तहका सरकार सम्म

काठमाडौं । संसद भंग भएर झन विवादमा तानिएको नेपाल कम्युनिष्ट पार्टी (नेकपा) को आन्तरिक अंक गणित प्रदेश तहसम्म पुगेको छ । विभाजनमा प्रदेश सरकारको अंकगणित के हुन्छ भन्ने जोडघटाउ दुबै पक्षले सुरु गरेका छन् । गण्डकी प्रदेशमा अहिले नेकपाको दुई तिहाइ बहुमतको सरकार छ ।

नेकपा फुटेमा बागमती प्रदेश सरकार अल्पमतमा पर्ने देखिएको छ ।संविधानको धारा १८८ को उपधारा २ मा मुख्यमन्त्रीले प्रतिनिधित्व गर्ने दल विभाजन भएमा वा प्रदेश सरकारमा सहभागी दलले समर्थन फिर्ता लिएमा ३० दिनभित्र विश्वासका मतका लागि प्रदेशसभा समक्ष प्रस्ताव राख्नुपर्ने व्यवस्था छ ।

मुख्यमन्त्रीको प्रस्ताव बहुमतले पारित हुन नसकेमा आफ्नो पदबाट मुक्त हुने उपधारा ३ ले व्यवस्था गरेको छ । सोही धाराको उपधारा ४ मा एक चौथाइ सांसदले अविश्वासको प्रस्ताव पनि पेश गर्न सक्ने व्यवस्था छ । नेकपा विभाजन भएमा अर्को पक्षले अविश्वासको प्रस्ताव पनि पेश गर्ने देखिएको छ ।

मुख्यमन्त्रीका लागि प्रस्तावित नामसहित अविश्वासको प्रस्ताव भएर बहुमतले पारित गरेमा अहिलेको सरकार ढल्ने छ । यस्तै कर्णाली प्रदेशबाट भएको विवाद अहिले संसद विघटन सम्म पुगेको छ । शक्तिको जोडघटाउ सातै प्रदेशमा सुरुभएको छ ।