पेट्रोल र डिजेलको मूल्य बढ्यो

काठमाण्डौ । नेपाल आयल निगमले गएराति १२ बजेपछि लागू हुने गरी पेट्रोल र डिजेलको मूल्य बढाएको छ । निगमले पेट्रोल प्रति लिटरमा ९ रुपैयाँ बढाएको छ भने डिजेल र मट्टीतेलमा लिटरमा सात रुपैयाँ बढाएको हो ।

भारतबाट मूल्य बढेर आएका कारण बढाइएको आयल निगमले जानकारी दिंदै खाना पकाउने एलपी ग्यासको मूल्य भने प्रतिसिलिण्डर एक सय ३० रुपैयाँ घटाएको छ । अब एलपी ग्यासको मूल्य प्रतिलिण्डिर एक हजार ६ सय ६० रुपैयाँमा कायम भएको छ । पेट्रोलको मूल्य प्रतिलिटर वर्गअनुसार पहिलो वर्गमा एक सय ७०, दोस्रो वर्गमा एक सय ७२ र तेस्रो वर्गमा एक सय ७३ रुपैयाँ पुगेको छ । डिजेल र मट्टितेलको मूल्य पहिलो वर्गमा एक सय ५०, दोस्रोमा एक सय ५२ र तेस्रो वर्गमा एक सय ५३ रुपैयाँ भएको छ ।

सरकारले पेट्रोलियम पदार्थको भाउमा स्वचालित मूल्य प्रणाली लागू गरेसंगै भारतबाट पेट्रोलियम पदार्थको भाउ घटबढ भएर आउने बित्तिकै नेपालमा पनि घटबढ हुन्छ ।