- १४ जेष्ठ २०८३, बिहीबार / May 28, 2026
पोखरा । पोखरामा नवौँ राष्ट्रिय खेलकुदको आयोजना गरिएको छ । राष्ट्रिय खेलकुद सुरु भएको ३९ वर्ष पछि दोस्रो पटक यहाँ आयोजना गरिएको हो । २०४० सालमा पहिलो संस्करणको आयोजना भएको पोखरामा यस पटक नवौँ राष्ट्रिय खेलकुद आयोजना गरिएको बताइएको छ ।
२०७७ फागुन २१–२७ सम्म गण्डकी प्रदेशमा हुने घोषणा भए पनि कोरोना महामारीका कारण ३ वर्ष पछि नवौँ राष्ट्रिय खेलकुदको उद्घाटन उपराष्ट्रपति नन्दकिशोर पुनले गर्दैछन् । देशैभरका खेलाडी र प्रशिक्षक पोखरा पुगेका छन् भने उद्घाटनमा सातौँ दक्षिण एसियाली खेलकुद सागका स्वर्ण पदकधारी तथा ओलम्पियन टीकाबहादुर बोगटीले ओलम्पिक टर्च प्रज्वलन गर्नेछन् ।
प्रतियोगितामा ६ हजार १ सय ५७ खेलाडी सहभागी हुनेछन् भने ७ वटा प्रदेशसहित नेपाली सेना, नेपाल प्रहरी, सशस्त्र प्रहरीसहित तीन विभागीय टोली र एनआरएनए गरी १९ टोलीले भाग लिनेछन् । गण्डकीका मनाङ, मुस्ताङ र लमजुङबाहेक अन्य जिल्लामा प्रतियोगिता आयोजना हुनेछ । ३६ मध्ये २६ खेल पोखरामा सञ्चालन हुने राष्ट्रिय खेलकुद परिषद्का सदस्यसचिव टङ्कलाल घिसिङले बताए ।
