भक्तपुरमा खाद्य पसल अनुगमन

भक्तपुर । भक्तपुर नगरपालिकाले अनुगमनलाई तीब्रता दिएको छ । समितिका संयोजक एवं वडा नं ३ का वडाध्यक्ष राजकृष्ण गोराको नेतृत्वमा सल्लाघारीमा खाद्यान्न पसलहरू अनुगमन गरिएको हो ।

अनुगमनका क्रममा बिहीबार म्याद नाघेको खुद्रा मूल्य २८ हजार रुपैयाँ बराबरको सामान नष्ट गरिएको संयोजक गोराले बताए ।

त्यस्तै २०६६ सालदेखि भक्तपुर नगरपालिकामा बिना दर्ता पसल सञ्चालन गरेको ‘फेमिली मिनी स्टोर’ लाई पसल दर्ता गर्न निर्देशन दिइएको छ ।

साथै प्याकेजिङ सामानमा खाद्य संस्थानको अनुज्ञा पत्र लिएर मात्र विक्री वितरण गर्न र तराजु नापतौल विभागमा नवीकरण गर्न भनिएको छ ।

अनुगमनमा परेका पसलहरूलाई एक हप्ताभित्र नगरपालिकामा उपस्थित हुन निर्देशन दिइएको वडा निरीक्षक रामकृष्ण प्रजापतिले सुनाए ।