- २८ जेष्ठ २०८३, बिहीबार / Jun 11, 2026
काठमाडौं । बङ्गलादेशले फूलबारी बङ्गलाबन्ध नाका खुला गरेपछि नेपाली धागो निर्यात गर्न सहज भएको छ । धागो निर्यात गर्न एक महिनाअघि नाका खुला भएको उद्योग, वाणिज्य तथा आपूर्ति मन्त्रालयका प्रवक्ता डा. नारायणप्रसाद रेग्मीलेबताए । लामो समयदेखि बन्द नाका खुला भएसँगै नेपाली व्यवसायी उत्साहित भएका छन् ।
बेनापोल (बङ्गलादेश)–पेट्रापोल (भारत) नाका खुला भए पनि नेपाली व्यवसायीलाई सामान पठाउन टाढा हुँदा लागत महँगो पर्ने गरेकाले धागो निर्यात हुन सकेको थिएन । भारतले फूलबारी–बङ्गलाबन्ध नाका नेपाल–बङ्गलादेशबीचको व्यापारका लागि उपलब्ध गराएको ‘ट्रान्जिट’ प्वाइन्ट हो ।
पूर्वी नाका काँकडभिट्टाबाट करिब ८० किलोमिटरको दूरीमा मात्रै बङ्गलादेश रहेको छ । बङ्गलादेशमा स्वदेशी धागो निर्यातको पर्याप्त सम्भावना भएकाले व्यवसायीलाई निर्यात गर्न सहज हुने प्रवक्ता रेग्मीले बताए । बङ्गलादेशमा धागो निर्यात बढाएर व्यापार घाटा कम गर्न सकिने उनका भनाइ छ ।
सो नाका सन् २००२ देखि बन्द रहेको थियो । भारततर्फको नाका पेट्रापोल नेपालबाट टाढा भएको र समुद्री मार्गबाट सामान पठाउँदा ढुवानी लागत नै महँगो पर्ने भएकाले व्यवसायीले सामान पठाउन सकेका थिएनन् । बङ्गलादेशमा धागो निर्यात गर्न नाका खुला भए पनि सामान कसरी पठाउने प्रक्रिया स्पष्ट नहुँदा धागो निर्यात गर्न नसकिएको नेपाल धागो उत्पादक सङ्घका सचिव उत्तम गौतमले बताए ।
धागो निर्यातका लागि नाका खुला गरेको जानकारी आयो तर कार्यविधि स्पष्ट नहुँदा गुणस्तर देखाएर बीचमै सामान रोकिएर फिर्ता आउँछ कि भनेर पठाउन नसकेको उनको भनाइ छ । धागो निर्यात हुन थालेको पहिलो वर्ष नै बङ्गलादेशमा पाँच अर्बदेखि सात अर्ब रुपियाँ र दुई वर्षभित्रमा वार्षिक २० अर्ब रुपियाँ बराबरको धागो निर्यात गर्न सकिने उनले बताए ।
