बुधबार नेपाल अमेरिकासँग भिड्दै

काठमाडौं । आईसीसी विश्वकप क्रिकेट लिग–२ विश्वकप छनोटको चौथो खेलमा बुधबार नेपाल अमेरिकासँग भिड्ने भएकाे छ । घरेलु खेल मैदान कीर्तिपुरस्थित त्रिविमा बिहान साढे ९ बजे खेल सुरु हुनेछ । त्रिकोणात्मक सिरिजमा दोस्रो पटक नेपाल र अमेरिका खेल्न लागेका हुन् ।

दुवै टोली सिरिजको सुखद अन्त्य गर्न जित्नै चाहन्छन् । पहिलाे खेलमा नेपालसंग अमेरिका ३५ रनले पराजित भएको थियो । अमेरिकाले सिरिजमा कुनै जित निकाल्न सकेन । ओमानसंग दुवै खेलमा अमेरिका पराजित भएको थियो । यस्तै नेपालले सिरिजका ३ खेल मध्य १ मा जित र २ मा हार ब्यहोरेको छ ।

दुवै पटक ओमानसंग पराजित भएको नेपाल, पहिलो खेलमा १८ रनले पराजित हुदै दोस्रो खेलमा ओमानसंग ८ विकेटले हारेको थियो । ओमान सिरिजमा चारै खेलमा जित निकाल्दै लिग तालिकाको शीर्ष स्थानमा उक्लिएको छ । अमेरिका दोस्रो स्थानमा रहँदा नेपाल पुछारबाट दोस्रो स्थानमा छ ।

अमेरिकासंगको पहिलो खेलमा नेपालका युवा खेलाडी कुशल मल्लले डेब्यु गरेका थिए । खेलमा उनले उत्कृष्ट अर्धशतकीय इनिङ्स खेले । ४९ रन बनाउँदा ५ विकेट गुमेको नेपालको लागि छैठौं र सातौं स्थानमा ब्याटिङ गर्न आएका कुशल र विनोद भण्डारीले नेपाली इनिङ्स उकासेका थिए ।

दुई खेलाडीले ८४ रनको साझेदारी गर्दै नेपालको जितको आधार तयार गरेका थिए । कुशलले ५१ बलमा ५ चौका र ३ छक्का सहित कीर्तिमानी ५० रन बनाए । एकदिवसीय अन्तराष्ट्रियमा अर्धशतक प्रहार गर्ने कुशल सबै भन्दा कम उमेरका खेलाडी बने ।