- ८ आश्विन २०८३, बिहीबार / Sep 24, 2026
मधेस । प्रदेश सरकारले सञ्चालन गरेको मुख्यमन्त्री ‘बेटी पढाऊ, बेटी बचाऊ’ कार्यक्रममा भ्रष्टाचार भएको खुलासा भएको छ । ब्रान्ड नखुलेका कमसल तथा गुणस्तरहीन लेडिज साइकल खरिद गरेर छात्रालाई वितरण गरेको पाइएको हो ।
ओम सत्य साई प्रालि वीरगन्जसँग अम्बिका ब्रान्डका १७ हजार २ सय ३८ साइकल आपूर्ति गर्ने प्रदेश सरकारले सम्झौता गरेको थियो । तर, १६ हजार ३८ थान ब्रान्ड नखुलेका कमसल तथा गुणस्तरहीन लेडिज साइकल खरिद गरिएको छ।
सम्झौता अनुसारका १२ सय मात्रै अम्बिका ब्रान्डका साइकल खरिदको भएको अख्तियारले जनाएको छ । छात्राको साइकल खरिदमा अनियमितता भएको भन्दै अनुसन्धानपछि अख्तियार दुरुपयोग अनुसन्धान आयोगले मुद्दा समेत हालेको छ ।
मुख्यमन्त्री लालबाबु राउतद्वारा सञ्चालित ‘बेटी पढाऊ, बेटी बचाऊ’ कार्यक्रममा १० करोड ३३ लाख अनियमितता भएको पाइएको हो।
अख्तियारले प्रदेश सचिव यामप्रसाद भुसालसहित १० जनाविरुद्ध दुइटा भ्रष्टाचार मुद्दा विशेष अदालतमा दायर गरेको अख्तियार प्रवक्ता एवं सहसचिव श्यामप्रसाद भण्डारीले बताए।
