- ७ कार्तिक २०८३, शनिबार / Oct 24, 2026
काठमाडौं । सङ्घीय संसद्को शिक्षा तथा स्वास्थ्य समितिद्वारा गठित उपसमितिले भक्तपुर खरिपाटीस्थित कोरोना सङ्क्रमित राखेको आइसोलेसन सेन्टर र नेपाल कोरिया नगरपालिका मैत्री अस्पतालको अनुगमन गरेको छ ।
संयोजक जीवनराम श्रेष्ठको नेतृत्वमा आएको टोलीले चाँगुनारायण नगरपालिका–७ स्थित विद्युत प्राधिकरणमा रहेको आइसोलेसनको अनुगमन गरेको हो । कोरोना सङ्क्रमितको अवस्था, खानपान, सरसफाइ र उपचारबारे जानकारी लिएको भक्तपुरका प्रमुख जिल्ला अधिकारी हुमकला पाण्डेले बताईन् ।
अनुगमनको क्रममा आइसोलेसनमा बिरामीको हेरचाह तथा सेवा सरकारले तोकेको मापदण्ड भन्दा राम्रो भइरहेको अनुगमन उपसमिति संयोजक श्रेष्ठले बताए । कोरोना ‘हब’को रूपमा रहेको भक्तपुर अस्पताल पिसीआर मेसिन उपलब्ध गराइदिन अनुगमन टोलीलाई शहीद धर्मभक्त राष्ट्रिय प्रत्यारोपण केन्द्रका प्रमुख डा. प्रेमराज ज्ञवालीले अनुरोध गरे ।
आइसोलेसनमा भइरहेको गतिविधि र व्यवस्थापनबारे भक्तपुर अस्पतालका मेडिकल सुपरिटेण्डेन्ट डा. सुमित्रा गौतमले जानकारी दिईन् । आइसोलेसन सेन्टरको उचित व्यवस्थापन भए पनि कोरोना परीक्षणका लागि पिसीआर मेसिन नहुँदा नतिजाका लागि धेरै दिन कुर्नु पर्ने बाध्यता रहेकोले चाँडो भन्दा चाँडो मेसिनको व्यवस्था गरिदिन गौतमले आग्रह गरिन् ।
