भक्तपुरका विभिन्न शक्तिपीठमा भक्तजनको भीड

भक्तपुर । बडादसैँको पाँचौँ दिन आज भक्तपुरका विभिन्न शक्तिपीठहरुमा विधिपूर्वक पूजा आराधना गर्नेको भीड लागेको छ । हरेक वर्ष आश्विन शुक्ल पञ्चमीका दिन अर्थात् दुर्गा पक्षको पाँचौँ दिन नवदुर्गामध्येकी पाँचौँ देवी स्कन्दमाताको विधिपूर्वक पूजा आराधना गरिन्छ ।

विहानैदेखि यहाँका मन्दिरमा भिड लागेको हो । दसैँको पहिलो दिन शैलपुत्री, दोस्रो दिन ब्रह्मचारिणी, तेस्रो दिन चन्द्रघण्टा, चौथो दिन कुष्माण्डा, पाँचौं दिन स्कन्दमाताको पुजा आरधना गरेर मनाइनछ । ब्रमायणी, इन्द्रायणी, बाराहीस्थानलगायत ९ स्थानमा भक्तजनले पुजा आरधना गरिरहेका छन् ।

छैटौँ दिन कात्यायनी, सातौँ दिन कालरात्री, आठौँ दिन महागौरी र नवौँ दिन सिद्धिदात्रीको पूजा आराधना गर्ने गरिन्छ । नौवटा दुर्गाका रूपलाई नवदुर्गा भनिन्छ । नवरात्रका नौ दिन घटस्थापना गरिएको स्थलमा दुर्गा सप्तशती (चण्डी), श्रीमद्देवीभागवत लगायत देवी स्तोत्र पाठ गरिन्छ । नवरात्रका अवसरमा देवीको आराधना गरी पूजा गरेमा शक्ति, ऐश्वर्य र विद्या प्राप्त हुने धार्मिक विश्वास छ ।