- ११ असार २०८३, बिहीबार / Jun 25, 2026
भक्तपुर । आगामी निर्वाचनमा कांग्रेसमा ७ रेक्टरको भुकम्प ल्याउने नेकपा एमालेको पोलिटव्युरो सदस्य एवं भक्तपुर क्षेत्र नं. २ प्रतिनिधिसभाका उम्मेदवार महेश बस्नेतले दावी गरेका छन् ।
प्रतिनिधिसभा तथा प्रदेशसभा निर्वाचनको लागि भक्तपुर क्षेत्र नं. २ ‘क’ सूर्यविनायक क्षेत्र निर्वाचन परिचालन कमिटीले आयोजना गरेको बृहत चुनावी सभालाई सम्बोधन गर्दै बस्नेतले कांग्रेसका नेता तथा कार्यकर्ता एमालेको समर्थनमा रहेको जिकिर गरे ।
कांग्रेसका हजारौं कार्यकर्ताहरु एमालेमा प्रवेश गरेको भन्दै भक्तपुरबाट कांग्रेसको सपोटमा ४०औं वर्ष एमालेले नेतृत्व गर्ने अवस्था आएको बताए । देशभर कांग्रेसलाई जनमतको माध्यमबाट जनताले लखेट्ने भन्दै कांग्रेसमा पिडित भएकाहरु सबै एमालेमा प्रवेश गरेको बताए ।
भक्तपुरका जनताका लागि एमालेको विकल्प कांग्रेस हुनै नसक्ने ठोकुवा गरे । निर्वाचनमा कांग्रेसले ठूलो पराजय व्यहोर्ने भविष्यवाणी समेत बस्नेतले गरेका छन् । गठबन्धनका उम्मेदवारहरुको कुनै चुनावी एजेण्डा नै नभएको उल्लेख गर्दै भ्रम फैलाउने बाहेक गठबन्धनले अरु केही नगरेको बताए ।
कार्यक्रममा प्रतिनिधिसभाका समानुपातिक उम्मेदवार गोविन्द दुलाल, प्रदेशसभाका समानुपातिक उम्मेदवार सकुन्तला श्रेष्ठ, जिल्ला अध्यक्ष बचन देउजालगायतले धारणा राअेका थिए ।
