- १६ असार २०८३, मंगलवार / Jun 30, 2026
बैतडी । भागरथी भट्टको बलात्कारपछि हत्या गरिएको दुई हप्ता वितिसक्दा पनि हत्यारा पत्ता लाग्न सकेको छैन । निर्मला पन्तकै जस्तो घटना र न्याय हुने होकी ? भन्नेमा आशंका व्यक्त गरिरहदा बैतडीका विद्यार्थीमा त्रास पैदा भएको छ । धेरै दिन त्यहाँका छात्रा विद्यालय नगएको बताईरहेकी छन् । कारण हत्या र बलात्कार ।
सनातन धर्म माविको कक्षा १२ पढ्ने अधिकाँश छात्राको भनाई यस्तै छ । सो घटनापछि धेरै छात्रा त्रास हुनु स्वभाविक पनि छ । किनकी हत्या र बलात्कारका घटनामा दोषी पत्ता नलाग्नु उनीहर सरकारको निरिहता ठान्दछन् । दोगडा केदार गाउँपालिका–७ इस्लेककी पूजा भट्टको भनाई पनि यस्तै छ ।
उनी भन्छिन्, ‘विद्यालयबाट घर आउने बाटोमै त्यस्तो बीभत्स घटना देखियो, अहिले पनि डर लागिरहेको छ।’ उनी पनि सोही विद्यालयको कक्षा १२ की छात्रा हुन् । दोगडाकेदार गाउँपालिका–३ खोचलेकमा रहेको सनातन धर्म माविमा जान चडेपानी गाउँबाट एक घण्टा बढी समय लाग्छ। अहिले एक्लै आवत जावत गर्न डर लाग्ने गरेको उनको भनाई छ ।
त्यो घटनाले निकै डर लागेको भन्दै विद्यालय जानुअघि सबै विद्यार्थी भेला हुने गरेको र कुनै समस्या आईपरे एक भएर लड्ने उनीहरुको भनाई छ । सरकारले छिटो भन्दा छिटो हत्यारा पत्ता लगावस नत्र त्यसको हिसाव किताव देखाएरै छाड्ने विद्यार्थीको भनाइ छ । अब त्यस्ता घटना हुन नदिन र हत्या गर्न पल्किएका जो सुकै हुन समूहमा एकै चिहान बनाउन सबै विद्यार्थी एक भएर विद्यालय जाने र आउने गरेका छौं भन्छिन् खोचलेक बजारकी राधिका भट्ट ।
लवलेक वनमा भएको त्यो घटनाले दुखि बनाए पनि अब त्यस्ता घटना दोहोरीन नदिन सुरक्षा सतर्कता अपनाउन पनि पाट सिकाएको विद्यार्थीको भनाई छ । त्यो ठाउँमा प्रहरी चौकी पनि आवश्यक रहेको उनीहरको भनाई छ ।
