भारतले रोक्यो बिजुली आपूर्ति

काठमाडौं । नेपालले इन्डियन इनर्जी एक्सचेन्ज (आईईएक्स) मार्फत् किनिरहेको बिजुली आपूर्ति रोकिदिएको छ । अहिले भारतमा बिजुली निकै महँगो भएको र बोलकबोलमा प्रतिस्पर्धा गर्न नसक्दा बिजुली आपूर्ति रोकिएको नेपाल विद्युत् प्राधिकरणका प्रवक्ता सुरेश भट्टराईले बताए ।

प्राधिकरणले मंगलबार राति १२ बजेदेखि बुधबार राति १२ बजेसम्मका लागि बिजुली किन्न बोलकबोलमार्फत प्रतिस्पर्धा गरेको थियो । तर नेपालले कबोलेको रकमभन्दा बढी मूल्य पुगेपछि बिजुली नपाएको हो ।

नेपालले अहिले भारतबाट दैनिक साढे ४ सय मेगावाटभन्दा बढी बिजुली किनिरहेको छ । आईईएक्समा हरेक १५ मिनेटमा बिजुलीको मूल्य फरक हुन्छ र एक दिनमा ९६ वटा फरक–फरक मूल्य युनिटका लागि प्रतिस्पर्धा गर्नुपर्छ ।

नेपालले बुधबार दिनभरीका लागि गरेको बोलकबोलभन्दा भारतीय बजारमा बिजुलीको मूल्य बढी भएपछि नपाएको हो ।