महालक्ष्मीको पूजा गरी आज बडादसैँ सकिँदै

काठमाडौं । यसवर्षको बडादसैँ आज सकिदैछ । आश्विन शुक्ल प्रतिपदाका दिनबाट शुरु दसैँ पर्व आज कोजाग्रत पूर्णिमाका दिन महालक्ष्मीको पूजा आराधना गरी समापन गरिँदैछ ।

आजको दिन सायङ्कालमा महालक्ष्मीको पूजा आराधना गरी राति जाग्राम बसेको मानिसका घरमा पृथ्वी भ्रमण गर्दै हिँडेकी महालक्ष्मी प्रवेश गरी धन, ऐश्वर्य दिई सम्पन्न बनाउँछिन् भन्ने धार्मिक विश्वास छ । आजको दिनलाई शरद पूर्णिमा पनि भनिन्छ ।

नवरात्र विजयादशमीकै दिन सकिने भए पनि दुर्गा पक्ष भने आश्विन शुक्ल पूर्णिमाका दिनमा मात्र सकिन्छ । यस दिन घटस्थापनाका दिन राखिएका जमरा विसर्जन गर्ने र माता दुर्गाका मुख्य तीन रूप महाकाली, महालक्ष्मी र महासरस्वतीमध्ये महालक्ष्मीको पूजा गरेर दुर्गा पक्षलाई बिदा गरिन्छ ।

यसैबीच प्रसिद्ध धार्मिक एवं पर्यटकीय महत्त्व बोकेको ताल तलैया मन्दिरमा दर्शनार्थीहरूको घुइँचो लाग्ने गरेको छ ।