- २१ कार्तिक २०८३, शनिबार / Nov 7, 2026
काठमाडौं । राष्ट्रपति र उपराष्ट्रपतिका सल्लाहकार आवश्यक नपर्ने भएकाले खर्च कटौती गर्नुपर्ने प्रतिनिधिसभा सदस्य एवं नेकपा एमालेका नेता रघुजी पन्तले बताएका छन् । प्रतिनिधिसभा बैठकमा बोल्दै उनले राष्ट्रपति र उपराष्ट्रपतिलाई सल्लाहकार नचाहिने भएकाले उनीहरूको नाममा जाने बजेट कटौती गर्नुपर्ने माग गरेका हुन ।
राष्ट्रपतिको सल्लाहकार भनेकै प्रधानमन्त्री र मन्त्रिपरिषद् भएकाले छुट्टै सल्लाहकार आवश्यक नभइको भन्दै जनताले तिरेको करको दुरुपयोग भएको आरोप लगाए ।
पन्तले भने, ‘राष्ट्रपतिको सल्लाहकार भनेको प्रधानमन्त्री र मन्त्रीपरिषद् हो ।
उपराष्ट्रपति पदेन राष्ट्रिय सभाको अध्यक्ष हुनुपर्छ । यसमा हामी खर्च घटाउने गरी संशोधनमा राष्ट्रिय सहमति गरौँ ।’ पन्तलाई ढाडस दिदैसांसद रञ्जुकुमारी झाले पनि राष्ट्रपति र उपराष्ट्रपतिले सल्लाहकार राख्ने व्यवस्था हटाउनुपर्ने माग गरिन् ।
संसद बैठकमा उनले उपराष्ट्रपतिलाई राष्ट्रिय सभा अध्यक्षको भूमिका निर्वाह गर्ने व्यवस्थासहित संविधान संशोधन गर्नुपर्ने धारणा राखिन् । पूर्वमन्त्रीहरूलाई दिइने सुविधासमेत कटौती गर्नुपर्ने साँसदहरुले माग गरेका छन् ।
