राहत रकम धमाधम जुट्दै

काठमाडौं । भूकम्पपीडितको सहायताका लागि प्रधानमन्त्री दैवीप्रकोप उद्धार कोषमा धमाधम रकम जुट्दै छ । भाट्टभटेनी सुपरमार्केटले १ करोड ११ लाख ११ हजार १ सय ११ रुपैयाँ प्रदान गर्ने जनाएको छ ।

सञ्चालक मीनबहादुर गुरुङले उक्त रकम प्रदान गर्ने बताए । उनले भूकम्पपीडितलाई खाद्यसामग्री पनि प्रदान गर्ने बताएका छन् । उद्धारका लागि सिटिजन्स बैंक इन्टरनेसनले २५ लाख रुपैयाँ, यती ब्रुअरी (अर्ना बियर)ले २५ लाख, कांग्रेस नेता तथा औषधि व्यवसायी डा.अबुल हुसेन अन्सारीले ४ लाख बराबरको औषधि सहयोग गरेका छन् ।

गैरआवासीय नेपाली संघले सरकारको राहत कोषमा ३१ लाख रुपैयाँ जम्मा गर्न लागेको जनाएको छ । घाइते भएकाहरूको केएमसी अस्पतालले निःशुल्क उपचार गर्ने प्रतिबद्धता जनाएको छ ।

राष्ट्रिय सभाकाअध्यक्ष गणेशप्रसाद तिमिल्सिनाले एक महिनाको तलब भूकम्प पीडित राहतकोषमा जम्मा गर्ने घोषणा गरेका छन् । यसरी सहयोग जुट्नेक्रम जारी रहेको छ ।