राहदानी अब ५ हजार रुपैयाँमै उपलब्ध हुने

काठमाडौं । ६६ पृष्ठको राहदानी अब ५ हजार रुपैयाँमा नै उपलब्ध हुने भएको छ । यसअघि जिल्ला प्रशासन कार्यालयले १० हजार रुपैयाँमा सो राहदानी उपलब्ध गराउँदै आएको थियो । राहदानी विभागले सेवाग्राहीलाई मर्का परेको भन्दै अबदेखि ५ हजार रुपैयाँमा उपलब्ध गराउन लागेको हो ।

गत जेठ २४ गते बसेको मन्त्रिपरिषद् बैठकले ६६ पृष्ठको राहदानी ३४ पृष्ठको राहदानी बराबरको मूल्यमा सेवाग्राहीलाई उपलब्ध गराउने निर्णय गरिएको परराष्ट्रमन्त्री एनपी साउदले बताए । यस्तै, सामान्यतया विदेश जाने सेवाग्राहीलाई विभागले ३४ पृष्ठको राहदानी ५ हजार रुपैयाँमा दिँदै आएको थियो ।

विभागले हिजो ७७ वटै जिल्ला प्रशासन कार्यालय, राहदानी सेवा प्रदान गर्ने इलाका प्रशासन कार्यालयहरू र विदेशस्थित सबै नेपाली नियोगहरूलाई परिपत्र गरेर राहदानी दस्तुरसम्बन्धी जानकारी गराएको विभागका निर्देशक दुरपदा सापकोटाले जानकारी दिइन् ।

परिपत्रमा मन्त्रिपरिषद्को निर्णयअनुसार ६६ पृष्ठको साधारण विद्युतीय राहदानीको दस्तुर ३४ पृष्ठको साधारण विद्युतीय राहदानीको दस्तुर सरह कायम गर्ने गरी संशोधन गरिएको र असार ३ गतेबाट संशोधित दस्तुर लागू गर्न निर्देशन दिइएको छ ।