- ६ श्रावण २०८३, बुधबार / Jul 22, 2026
काठमाडौं । विवाद टुंगो लाग्न नसक्दा रोकिएका नेपाली कांग्रेस तल्लो तहका अधिवेशन शनिबारबाट सुरु भएका छन् । प्रदेश २ को सर्लाही, पर्सा र रसुवाबाहेक जिल्लामा शनिबार वडा अधिवेशन सुरु भएको हो ।
१३ जिल्लाको क्रियाशील सदस्यता विवादले अन्य जिल्लामा पनि प्रक्रिया रोकिएको थियो। १३ जिल्लाका सबै अधिवेशन सके पनि प्रदेश २ का आठसहित डोल्पा, बाँके, कैलाली, सुर्खेत, रसुवा जिल्लामा वडा अधिवेशन सुरु हुन सकेको थिएन।
बाँकी रहेका सबै जिल्लाको अधिवेशन एकसाथ अघि बढाउने निर्वाचन समितिको संशोधित कार्यतालिकाअनुसार फेरि अधिवेशन प्रक्रिया सुरु भएको हो। महाधिवेशन तयारीबारे विभिन्न निर्णय गर्न आइतबार कांग्रेस केन्द्रीय समितिको बैठक डाकिएको छ।
यसैबीच पदाधिकारी र पूर्वपदाधिकारीको बैठकमा नेता रामचन्द्र पौडेलसहितका नेताहरूले न्यायालयमा देखिएको विवादका विषयमा पार्टीले धारणा बनाउनुपर्नेमा जोड दिएका छन्।
तर सभापति शेरबहादुर देउवाले भने न्यायालयमा देखिएको विवादले समस्या उत्पन्न भए पनि त्यसको समाधान न्यायालयभित्रैबाट निकाल्नुपर्ने बताएउँदै आएका छन् । संवैधानिक सीमाभित्र रहेर सर्वोच्च अदालतमा देखिएको समस्याको समाधान त्यहींबाट खोज्नुपर्ने देउवाको धारणा छ ।
