ललिता निवासको जग्गाभित्रका संरचना हटाउन काठमाडौँ महानगरको कडा निर्देशन

काठमाडौं । ललिता निवास जग्गाभित्र रहेका संरचना हटाउन काठमाडौं महानगरपालिकाले निर्देशन दिएको छ । आइतबार महानगर प्रहरीको टोलीले बालुवाटारस्थित ललिता निवासको जग्गामा पुगेर जग्गाभित्र रहेका संरचना हटाउन र थप कुनै पनि संरचना नबनाउन निर्देशन दिएको हो ।

सार्वजनिक जग्गा संरक्षण स्थानीय सरकारको जिम्मेवारी भएकाले महानगरको निर्देशन अनुसार जग्गा भित्र रहेका संरचना हटाउन निर्देशन दिएको र अटेर गरे महानगर प्रहरीले हटाउने महानगर प्रहरी प्रमुख राजुनाथ पाण्डेले बताए ।

ललिता निवासको जग्गा रोक्का भइसकेको अवस्था र सम्बन्धित निकायले अनुसन्धान अन्तिम अवस्थामा पु¥याइसकेकाले थप कुनै पनि संरचना निर्माण हुन नदिन महानगरले निगरानी गरेको छ । सार्वजनिक जग्गा संरक्षणका लागि महानगरले काम सुरु गरेको उनले बताए ।