- २ भाद्र २०८३, मंगलवार / Aug 18, 2026
काठमाडौं । ललिता निवास प्रकरणमा सर्वोच्च अदालतले आफूमाथि छानबिन गर्नुपर्ने आदेश दिएको विषयमा पूर्वप्रधानमन्त्री डा. बाबुराम भट्टराईले बयान दिन तयार रहेको बताएका छन् । आफू सहयोग गर्न तयार रहेको भन्दै उनले भने, ‘मेरो पालामा थोरै एउटा सानो निर्णय भएको रहेछ, त्यो मेरो व्यक्तिगत कुरा थिएन, म बयान दिन म तयार छु ।’
भ्रष्टाचारसम्बन्धी मुद्दाको छानबिनका लागि बलियो र निष्पक्ष आयोग गठन हुनुपर्ने भट्टराईको भनाइ छ । विगतका आयोगजस्तो नभई भ्रष्टाचारका सबै फाइल खोल्ने गरी उच्चस्तरीय आयोग गठनको आवश्यकता रहेको उनको भनाइ छ ।
शुक्रबार बुटवलमा आयोजित पत्रकार सम्मेलनमा अध्यक्ष भट्टराईले भ्रष्टाचार निर्मूल पार्नका लागि व्यक्ति व्यक्तिलाई मात्रै कारबाही गरेर नहुने भन्दै संरचनागत ढङ्गले जानुपर्ने बताए । देशको प्रमुख कार्यकारी (प्रधानमन्त्री) माथि नै प्रश्न उठेको अवस्थामा उच्चस्तरीय र निष्पक्ष छानबिनका लागि आयोग गठन गर्नु आवश्यक रहेको बताए ।
संसदमा प्रमुख विपक्षी दल नेकपा एमालेले उच्चस्तरीय छानबिन समिति गठनको माग गर्नु अधिकारको कुरा भएको बताए । पार्टीको प्रदेशस्तरीय प्रशिक्षण अभियान लिएर हिँडेका अध्यक्ष भट्टराईले संविधान जारीपछि माओवादी आन्दोलनको कार्यभार पूरा भएकाले आफू त्यसभन्दा पनि अघि बढेको बताए ।
देशमा नयाँ र वैकल्पिक शक्तिको खाँचो औँल्याउँदै उनले त्यहीअनुसार नेसपा अघि बढेको दाबी गरे ।
