लामो दूरीका गाडी सञ्चालनको तयारी

काठमाण्डौ । जनस्वास्थ्यको मापदण्ड पालना हुने गरी मध्यम तथा लामो दूरीका सार्वजनिक गाडी सञ्चालनमा गृह मन्त्रालयले सहजीकरण गर्न निर्देशन दिएको छ । देशका विभिन्न भागबाट परीक्षार्थीको आवागमनलाई ध्यान दिँदै गाडी सञ्चालनमा सहजीकरण गर्न लागिएको मन्त्रालयले गृहमन्त्रालयले जनाएको छ । लोकसेवा आयोग, विश्वविद्यालय तथा कक्षा १२ को परीक्षाको लागि मन्त्रालयले प्रहरी प्रधान कार्यालय र सबै जिल्ला प्रशासन कार्यालयलाई परिपत्र समेत गरिसकेको जनाएको छ ।

काठमाण्डौ, ललितपुर र भक्तपुरका प्रमुख जिल्ला अधिकारीहरुको बैठकले अत्यावश्यक काम विशेषले काठमाण्डौ उपत्यका प्रवेश गर्ने सार्वजनिक तथा निजी गाडीलाई आवतजावत गर्न दिइने निर्णय गरेको थियो । तर, लामो दूरीको यातायात सञ्चालन गर्नेबारे निर्णय भएको थिएन । लामो दूरीको सार्वजनिक यातायात सञ्चालनबारे शुक्रबार टुङ्गो लगाउने तयारी छ ।