विद्युतीय स्कुटरको आज उदघाटन

काठमाडौं । नेपाल विज्ञान तथा प्रविधि प्रज्ञा प्रतिष्ठान (नास्ट)ले आज विद्युतीय स्कुटरको उद्घाटन गर्ने भएको छ । एकपटक चार्ज गर्दा ५० किलोमिटर गुड्ने उक्त विद्युतीय स्कुटर लुम्बिनी प्रदेश सरकारसँगको सहकार्यमा बनाइएको हो ।

आज दिउँसो ऊर्जामन्त्री पम्फा भुसाल, शिक्षामन्त्री देवेन्द्र पौडेल लगायतले संयुक्त रुपमा उदघाटन गर्ने कार्यक्रम रहेको छ । पेट्रोलियम पदार्थको मूल्य अत्याधिक वृद्धि भइरहेको बेला नेपाली माटो सुहाउँदो नमूना स्कुटर निर्माण गरिएको

नास्टका प्रविधि संकाय प्रमुख एवं इलेक्ट्रिक स्कुटर निर्माण कार्यक्रमका प्रमुख रवीन्द्र ढकालले बताए । स्कुटरमा दुई किलोवाट क्षमताको लिथियम आयन ब्याट्री जडान गरिएको छ ।

ब्याट्रीको क्षमता बढाउन पनि सकिने, हाल तयार भएको स्कुटर एक पटक चार्ज गर्दा ५० किलोमिटरभन्दा परसम्म गुड्ने प्रतिष्ठानका वरिष्ठ वैज्ञानिक ढकालले बताए । ब्याट्री र मोटरको क्षमता बढाउँदा ५० किलोमिटर भन्दा पनि बढी गुड्न सक्ने उनको भनाइ छ ।

एउटा नमूना स्कुटर बनाउन तीन लाख रुपैयाँ भन्दा बढी खर्च भएको ढकालले बताए । ठूलो मात्रामा नेपालभित्रै न्यूनतम एक लाख ५० हजारदेखि दुई लाख रुपैयाँसम्ममा विद्युतीय स्कुटर बनाउन सकिने ढकालले बताए ।

नास्टले नेपालमा नै कारखाना स्थापना गरेर काम गर्न प्राविधिक तथा आर्थिक तयारी बारेमा लुम्बिनी प्रदेश सरकारको सहकार्यमा सम्भाव्यता अध्ययन समेत गरिरहेको छ ।