- १३ आश्विन २०८३, मंगलवार / Sep 29, 2026
काठमाडौं। सरकारले प्रतिबन्धित लगाएको ‘विप्लव’ नेतृत्वको नेकपाले नेपाल बन्दसहित विरोधका विभिन्न कार्यक्रम सार्वजनिक गरेको छ । माघ १० गते नेपाल बन्दको घोषणा गरेको छ ।
माघ ३ गते देशव्यापी विरोध जुलुस, ५ गते देशव्यापी विरोध सभा, ७ गते देशव्यापी विरोध प्रदर्शन र ९ गते देशव्यापी मशाल जुलुस गर्नेसमेत सो पार्टीले जनाएको छ ।
केपी ओली नेतृत्वको सरकारले पार्टीको काममा खटिएका नेता कार्यकर्तालाई पक्राउ गरी यातना दिने, दुव्र्यवहार र कुटपिट गर्ने गरेको घटनाको निन्दा गर्दै विप्लव नेकपाले हिरासतमा निर्मम यातना दिने, जेल हाल्ने र लाखौं धरौटी तोक्ने गरेकोले त्यो सबै गतिविधि बन्द गर्न माग गरेको छ।
पुस २९ गते पार्टी केन्द्रीय सचिवालय सदस्य कन्चन, विवेक र विशाललाई प्रहरीले ललितपुरबाट पक्राउ गरेको घटनामा गम्भीर ध्यानाकर्षण भएको भन्दै उसले त्यस्ता गैरन्यायिक गतिविधि रोक्न माग गरेको हो । जनताको मुक्तिका लागि सुरु गरिएको आन्दोलन धरपकड र यातनाले नरोकिने विप्लवले स्पष्ट पारेको छ ।
दमनले सफलता प्राप्त नगर्ने र केपी ओली नेतृत्वको सरकार छिट्टै पतन हुने ठोकुवा गरेको छ । प्रतिनिधिसभा विघटनविरुद्ध कांग्रेस, प्रचण्ड–नेपाल पक्षको नेकपा, जसपालगायतका दल सडक संघर्षमा उत्रेका बेला विप्लवको देशव्यापी विरोध कार्यक्रमले अर्थपूर्ण ढंगमा हेरिएको छ।
