- २८ भाद्र २०८३, आईतवार / Sep 13, 2026
काठमाडौं । विश्वभर १ करोडबढी सक्रिय संक्रमित रहेका छन्।२४ घण्टामा थप ४ लाख ५२ हजार ४६२ जना संक्रमित भएसँगै संक्रमितको संख्या ४ करोड २९ लाख २३ हजार ९४२ पुगेको छ । त्यसमध्ये ७७ हजार १ सय ९५ जना सक्रिय संक्रमित रहेका छन् । २ लाख ४० हजार ५ सय ५७ जना निको भएर घर फर्किएका छन् भने संक्रमण मुक्त हुनेको संख्या ३ करोड १६ लाख ६५ हजार ७०५ पुगेको छ । यता नेपालको पोखराका चारसहित थप सात जना संक्रमितको मृत्यु भएको छ ।
पोखरा महानगरपालिका १ का ४२ वर्षीय कोरोना संक्रमित पुरुष, महानगरपालिका २२ का ६८ बर्षीय पुरुष, महानगरपालिका ३१ का ५८ बर्षीय पुरुष, महानगरपालिका १५ का ५२ वर्षीया महिलाको मृत्यु भएको हो । योसँगै गण्डकी प्रदेशमा कोरोनाको संक्रमणबाट मृत्यु हुनेको संख्या ६३ पुगेको छ । यस्तै मोरङको विराटनगरमा कोरोना संक्रमित थप एक जनाको मृत्यु भएको छ । नेपाली कांग्रेस मोरङ जिल्ला सदस्य ५४ वर्षीय दिना मण्डलको मृत्यु भएको हो ।
यस्तै सुनसरीको धरान उपमाहानगरपालिकामा पनि थप एक संक्रमितको मृत्यु भएको छ । धरान १७ का ६२ वर्षीय महिलाको बीपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको हो । यता धनगढीमा पनि थप एक संक्रमितको मृत्यु भएको छ । डोटीका व्यापारीको धनगढीमा कोरोनाबाट मृत्यु भएको हो । जेभी आयल स्टोर दिपायलमा कार्यरत कोरोना संक्रमित कर्णबहादुर भण्डारीको मृत्यु भएको हो ।
जनार्दन शर्मालाई कोरोना
नेकपा नेता एवं पूर्वमन्त्री जर्नादन शर्मालाई कोरोनाभाइरसको संक्रमण पुष्टि भएको छ । शर्माकी पत्नी लक्ष्मीलाई पनि संक्रमण पुष्टि भएको छ । आफ्नो सम्पर्कमा आएका सबैलाई सर्तक रहन र समस्या देखिएमा परीक्षण गराउन आग्रह शर्माले अनुरोध गरेका छन् ।
