विश्वासको मतमाथि छलफल गर्दै प्रदेश १, मतदान मिति आजै टुङ्गो लगाउन विपक्षीको दवाव

विराटनगर । प्रदेश १ प्रदेशसभाको नवौं तथा हिउँदे अधिवेशनको तेस्रो बैठक बस्दैछ । आज दिउँसो १ बजे बस्ने बैठकमा मुख्यमन्त्री भीम आचार्यले संसद सचिवालयमा दर्ता गराएको विश्वासको मत सम्बन्धी प्रस्ताव पेश हुने कार्यसूची रहेको छ ।

भदौ १० गते मुख्यमन्त्री नियुक्त भएका आचार्यले विश्वासको मत लिने सम्बन्धी प्रस्ताव असोज २५ गते सचिवालयमा दर्ता गराएका थिए । शुक्रबार बस्ने बैठकमा सो प्रस्ताव टेवल गरेपछि छलफलको प्रकृयामा जानेछ ।

मतदान समय केही दिन पर धकेल्न सत्ता पक्षको तयारीलाई मध्यनजर गरी विपक्षीले आजै मतदानको मिति तय गरिनु पर्ने जिकिर गरेको छ । एक महिनाभित्र विश्वासको मत लिनुपर्ने संवैधानिक बाध्यता भए पनि मुख्यमन्त्री आचार्यले संसद छलेर धमाधम राजनीतिक नियुक्ति गरिरहेको विपक्षीको आरोप छ ।