संघीयताविरुद्ध जनमोर्चा सडकमा आउँने

काठमाडौं । चित्रबहादुर केसी नेतृत्वको राष्ट्रिय जनमोर्चा सङ्घीयताका विरुद्ध सडकमा आउँने भएको छ । चैत १० देखि १५ गतेसम्म देशव्यापी अभियान चलाउने निर्णय गरेको जनमोर्चाले उक्त अभियान अन्तर्गत पहिलो चरणमा सभा र कोणसभाहरू गर्ने जनाएको छ ।

बुटवलमा सम्पन्न भएको जनमोर्चाको राष्ट्रिय परिषदको प्रथम बैठकले चैत २४ गते देशव्यापी रूपमा ‘गणतन्त्रको रक्षा गरौँ, प्रतिगमनका विरुद्ध सङ्घर्ष गरौँ” भन्ने मूल नारा तय गर्दै जनआन्दोलन दिवस मनाउने निर्णय गरेको छ । यस्तै बैठकले आगामी वैशाख र जेठ महिनामा देशव्यापी रूपमा जिल्ला सम्मेलन तथा भेला गर्ने निर्णय गरेको छ ।

असोज महिनामा देशव्यापी रूपमा एक महिने सदस्यता वितरण अभियान सञ्चालन गर्ने निर्णय गरेको छ । वैशाख १० गते चितवन २ मा हुने उपनिर्वाचनलाई नेपालमा बढ्दो अमेरिकी साम्राज्यवादको प्रभाव, इशाईकरणका विरुद्ध भण्डाफोर अभियानका रूपमा उपयोग गर्ने निर्णय पनि गरेको छ ।

जसअनुसार राष्ट्रिय जनमोर्चाले केन्द्रीय उपाध्यक्ष जनकराज शर्मालाई उम्मेदवार बनाउने निर्णय गरेको छ । उपनिर्वाचनको प्रचारप्रसारलाई व्यवस्थित बनाउन महासचिव मनोज भट्टको संयोजकत्वमा २५ सदस्यीय निर्वाचन परिचालन समिति गठन गरेको अध्यक्ष केसीले बताए ।