- १३ असार २०८३, शनिबार / Jun 27, 2026
भक्तपुर। साउन महिनाको अन्तिम सोमबार भक्तपुरको प्रसिद्ध शिवालय केदारनाथको शिर डोलेश्वरमा भक्तजनको घुइचो लागेको छ । साउन महिना भर व्रत बसी पुजाआजा गरे मागेको पुग्ने दृष्टिकोण अनुसार पुजा गर्ने भक्तजनको घुइचो लागेको हो । हिन्दु परम्परा अनुसार यो दिनलाई महत्वपूर्ण दिनका रुपमा लिने गरिन्छ । यो दिन महिलाहरुले पूजा आराधना गरी साउनको सोमबारे व्रत समापन गर्ने प्रचलन समेत रहेको छ ।
साउनको पहिलो सोमबारदेखि सुरु भएको व्रत शिव मन्दिरमा पुगेर पूजा आराधना गरी महिलाहरुले समापन गर्ने गर्दछन् । साउन महिना शिवजीसँग जोडिएको महिना भएकाले साउन महिनामा शिवको पूजा गरे सबै देवताको पूजा गरेबराबर फल प्राप्त हुन्छ भन्ने सनातन विश्वास रहेको छ । साउन महिना धार्मिक, प्राकृतिक एवं सांस्कृतिक दृष्टिकोणले महत्त्वपूर्ण भएकाले यो महिनालाई विशेष रूपमा लिने गरिएको छ ।
पार्वतीले साउन महिनाभरि निराहर रही कठोर व्रत बसेर भगवान शिवलाई प्राप्त गरेको किम्वदन्ती अनुसार महिलाहरूले यसलाई बढी महत्त्व दिएको पाइन्छ । विशेष गरी साउनको सोमबार शिवजीको व्रत एवं पूजा गर्ने चलन छ । यसै जनविश्वास अनुसार साउन महिनाको अन्तिम सोमबार डोलेश्वर महादेवको मन्दिरमा भीड लागेको हो ।
साउन महिना अधिक वर्षा हुने भएकाले शिवलाई बढी प्रिय लागेको किम्बदन्तीमा उल्लेख गरिएको छ ।
डोलेश्वर साउनको अन्तिम सोमबार दर्शन गर्न आउने भक्तजनहरुका कारण भरि भराउन भएको थियो । यहाँ दर्शन गर्न आउने भक्तजनहरुको लाइन पहिलेका सोमबारको भन्दा कम भएपनि सम्पूर्ण व्यवस्था गरिएकाले अप्ठेरो नभएको स्थानीयको भनाई छ । डोलेश्वर दर्शन गर्न जाने मानिसहरुको यातायात सुविधाका लागि ट्राफिक प्रहरिले पनि महत्वपूर्ण भूमिका खेलेको र शान्ति सुरक्षा कायम गर्न नेपाल प्रहरी लगायतका सुरक्षा निकायले पनि आफ्ना सम्पूर्ण युनिटहरुलाई परिचालन गरेको थियो । तस्वीरहरु
