- २५ भाद्र २०८३, बिहीबार / Sep 10, 2026
काठमाडौं । सुदूरपश्चिम प्रदेशमा प्रत्यक्षतर्फ प्रतिनिधि सभामा चार जना मात्रै महिला उम्मेदवार बन्ने भएका छन् ।
मंसिर ४ गते हुन लागेको प्रतिनिधि सभाका लागि नेकपा माओवादी केन्द्र, नेकपा एमाले र नागरिक उन्मुक्ति पार्टीले प्रतिनिधि सभाका लागि महिला उम्मेदवार बनाएको हो ।
सुदूरपश्चिममा प्रतिनिधि सभाका १६ वटा निर्वाचन क्षेत्र रहे पनि नेपाली कांग्रेसबाट एक महिला पनि प्रत्यक्षतर्फ उम्मेदवार बनाइएको छैन ।
कांग्रेसकी प्रभावशाली नेतृ प्रधानमन्त्री पत्नी आरजु राणा देउवा कैलाली क्षेत्र नम्बर ५ मा प्रत्यक्षतर्फ उम्मेदवार बन्ने चर्चा भए पनि अन्त्यमा उनलाई डडेल्धुराबाट समानुपातिकमा पठाइएको थियो ।
नेकपा माओवादी केन्द्रले प्रदेशमा प्रतिनिधि सभामा एक, नेकपा एमालेले दुई र नागरिक उन्मुक्ति पार्टीले एक गरी चार जना महिला उम्मेदवार प्रत्यक्षतर्फ उम्मेदवार बनेका हुन् ।
१६ वटा निर्वाचनका आधारमा प्रत्यक्षतर्फ प्रतिनिधिमा महिलाको सहभागिता २५ प्रतिशत देखिन्छ । संविधानले नै महिला सहभागिता ३३ प्रतिशतको व्यवस्था गरेको छ ।
तर, प्रतिनिधि सभामा महिला सहभागिता ३३ प्रतिशत पुगाउनतर्फ दलहरूले कुनै चासो नदिएको महिला नेतृहरू गुनासो गर्दै आएका छन् ।
नेकपा माओवादी केन्द्रले कञ्चनपुर निर्वाचन क्षेत्र नम्बर ३ मा प्रतिनिधि सभामा विना मगरलाई उम्मेदवार बनाएको छ । नेकपा एमालेले डोटीमा गौरी ओली र कञ्चनपुर क्षेत्र नम्बर ३ मा निरूदेवी पाललाई उम्मेदवार बनाएको छ ।
नागरिक उन्मुक्ति पार्टीले कैलाली निर्वाचन क्षेत्र नम्बर १ मा रञ्जिता श्रेष्ठ चौधरीलाई उम्मेदवार बनाएको छ । एक मात्र निर्वाचन क्षेत्र रहेको डोटीमा नेकपा एमालेकी गौरी ओली सत्ता गठबन्धनकाका तर्फबाट नेकपा एकीकृत समाजवादीका प्रेम आलेसँग चुनावी मैदानमा उत्रिएकी छन् ।
ओली नेकपा एमाले पोलिटब्युरो सदस्य तथा डोटी इन्चार्ज हुन् । पूर्व मन्त्री आले २०७० र २०७४ मा प्रत्यक्ष निर्वाचित सांसद हुन् । आले एमाले विभाजित भएसँगै माधव पक्षतिर लागेका थिए ।
