- १८ असार २०८३, बिहीबार / Jul 2, 2026
महोत्तरी । सशस्त्र प्रहरीले महोत्तरीबाट चार जनालाई पक्राउ गरेको छ । सशस्त्र प्रहरीले पाँच सय ५६ चौरी गाईको पुच्छरसहित चार जनालाई बुधबार पक्राउ गरेको हो । महोत्तरीको जलेश्वर नगरपालिका ३ मा रहेको मलिवाडा बसपार्कबाट उनीहरुलाई पक्राउ गरेको प्रहरीले जनाएको छ ।
काठमाण्डौबाट जलेश्वर हुँदै मलिवाडा रुटमा चल्ने प्रदेश २–०३–००१ ख १२१५ नम्बरको बसबाट मलिवाडा बसपार्कमा चौरी गाईको पुच्छर निकाली ठेलामा राख्ने क्रममा सशस्त्र प्रहरी बल नेपाल नम्बर ९ गण महोत्तरीले चार जनालाई पक्राउ गरेको जनाएको छ ।
बरामद भएको चौरी गाईको पुच्छरको बजार मूल्य २८ लाख ३० हजार रुपैयाँ रहेको छ । पक्राउ परेकाहरूलाई चौरी गाईको पुच्छरसहित आवश्यक कारबाहीका लागि सशस्त्र वन सुरक्षा शाखा माईस्थान महोत्तरीमा बुझाइएको छ ।
पक्राउ पर्नेमा जलेश्वरकै विकासकुमार महत्तो, धादिङको गजुरी गाउँपालिका ८ का ३६ वर्षीय उमेशबहादुर बस्नेत, बाराको सिमरा नगरपालिका १ का ६० वर्षीय सुमन मान्नधर र धनुषाको हसपुर नगरपालिका ४ का ३७ वर्षीय मोहमद अजिन रहेका छन् ।
