३ जना नक्कली परीक्षार्थी कास्कीमा पक्राउ

कास्की । ३ जना नक्कली परीक्षार्थीलाई प्रहरीले पक्राउ गरेको छ । वन रक्षकको परीक्षामा परीक्षा दिने ती जनालाई प्रहरीले पक्राउ गरेको हो । गण्डकी प्रहरी तालिम केन्द्र पोखरा परिसरमा शुक्रबार भएको परीक्षामा नक्कली परीक्षार्थी पक्राउ परेको प्रहरीले जनाएको छ ।

लोक सेवा आयोग, गण्डकी प्रदेशले खुलाएको वन रक्षक पदको लागि भएको शारीरिक तन्दुरुस्ती परीक्षामा कागजातहरु जाँच गर्ने क्रममा ३ जना नक्कली परीक्षार्थी फेला परेका हुन् । उनीहरुले परीक्षार्थीहरुको नामको सक्कल नागरिकतामा आफ्नो फोटो टाँस गरेर परीक्षा दिँदै गरेका थिए ।

उनीहरुलाई जिल्ला अदालतबाट शिक्षा ऐनसम्बन्धी मुद्दामा ८ दिनको म्याद थप गरी अनुसन्धान अघि बढाइएको जिल्ला प्रहरी कार्यालय कास्कीले जनाएको छ । पक्राउ पर्नेमा कालीकोट जिल्ला रास्कोट २, सिपखानाका १९ वर्षीय प्रेम भण्डारी, रास्कोट ४ सिउनाका २० वर्षीय गौरी संज्याल र १८ वर्षीय अर्का एक जना छन् । उनी नाबालक भएकोले प्रहरीले परिचय खुलाएको छैन ।