- १५ भाद्र २०८३, सोमबार / Aug 31, 2026
काठमाण्डौ । स्थानीय तह निर्वाचन २०७९ को सार्वजनिक मतपरिणाम अनुसार नेपाली कांग्रेस पहिलो पार्टी बनेको छ । हालसम्म सार्वजनिक गरिएको मतपरिणाम अनुसार नेपाली काँग्रेसले ३ सय २१ वटा पालिकाको प्रमुख पद जितेर पहिलो पार्टी बनेको हो । २ सय पालिकाको प्रमुख पद जितेर दोस्रो स्थानमा नेकपा एमाले रहेको छ । नेकपा एमालले १ सय २३ गाउँपालिका प्रमुख र ७७ वटा नगरपालिकामा प्रमुख जितेको छ ।
२४ वटा नगरपालिका र ९६ वटा गाउँपालिकाको १ सय २० पालिकाको प्रमुख जितेर नेकपा माओवादी केन्द्र तेस्रो स्थानमा रहेको छ । सबै भन्दा कम जनमत पार्टी दुई पालिका प्रमुख, नेपाल मजदुर किसान, विवेकशील साझा, तमलोपा र जनप्रगतिशील पार्टीले एक–एक पालिकाको प्रमुख जितेको तथ्याकं सार्वजनिक भएको छ । नेकपा एकीकृत समाजवादी १९,जनता समाजवादी पार्टी २९ र लोकतान्त्रिक समाजवादी पार्टीले १५ वटा पालिका प्रमुख जित्दै अन्य राजनीतिक दलहरुलाई पछाइ रहेका छन् ।
राष्ट्रिय प्रजातन्त्र पार्टी, राष्ट्रिय जनमोर्चा र नागरिक उन्मुक्ति पार्टीले देशभर चार–चार वटा पालिकाको प्रमुखमा विजय हासिल गरेका छन् । दशैभर हालसम्मको मतपरिणाम अनुार स्वतन्त्र उम्मेदवारले १२ वटा पालिकाको प्रमुख पदमा जित हासिल गरेका छन् ।
देशभरका ७ सय ५३ वटा पालिकामध्ये हालसम्म ७ सय ३४ वटा पालिकाको अन्तिम नतिजा सार्वजनिक भइसकेको छ । अहिलेसम्म २ सय ७५ नगरपालिका र ४ सय ५९ गाउँपालिका गरी ७ सय ३४ पालिकाको नतिजा सार्वजनिक भइसकेको छ भने १९ वटा पालिकाको मतपरिणाम मात्रै आउन बाँकी रहेको निर्वाचन आयोगले जनाएको छ ।
