- ३१ असार २०८३, बुधबार / Jul 15, 2026
काठमाडौँ । नेपाल प्रहरीले दुई जनालाई सार्वजनिक गरेको छ। मंगलवार उपत्यका अपराध अनुसन्धान कार्यालयले वैदेशिक रोजगारीको सिलसिलामा बुल्गेरिया, न्युजिल्याण्ड, रोमानिया, सर्विया, क्रोयशियासमेतका देशमा पठाउने भनी ठगी गर्ने दुईजनालाई पक्राउ गरि सार्वजनिक गरेको हो ।
पक्राउ पर्नेमा कन्सल्टेन्सी सञ्चालक धादिङको धुनिबेसी नगरपालिका ४ का आफ्नो नाम जीवा गौतम बताउने रमेश बयलकोटी र अर्का सञ्चालक कालिकोट छाप्रे ६ घर भएका दर्शन नेपाली रहेका छन्।
नक्कली नाम बताइ अर्को व्यक्तिको नाममा कम्पनी तथा बैंक खाता खोली मकार्ड समेत निकाली ४२२ जनालाई ठगी गर्ने गिरोह पक्राउ परेको उपत्यका अपराध अनुसन्धान कार्यालयले जनाएको छ । गिरोहले शुरुमा ५० हजारदेखि ३ लाख लिने र भिसा आएपछि अन्य रकम दिने भनी कर्मचारी खटाइ रकम लिने गरेको खुलेको प्रहरीले जनाएको छ ।
प्रहरीले नेपालीलाई कागेश्वरी नगरपालिका ७ बाट पक्राउ गरी आवश्यक कारबाही सुरु गरिएको जनाएको छ। बयलकोटीले कीर्तिपुर नगरपालिका ६ बस्ने ललितजङ बमलाई भिजा प्लस प्राइभेट लिमिटेड नामको कम्पनी दर्ता गर्न लगाइ ठगी गरेका प्रहरीले फेला पारेको छ ।
यसको मुख्य गिरोह भारतमा बसी काम गर्ने गरेको समेत प्रहरीले सार्वजनिक गरेको छ। महाराजगञ्जको कन्सलटेन्सीबाट २० र दर्शन नेपालीको जडिबुटीस्थित कोठाबाट १ र बयलकोटी बस्ने कोठा एकान्तकुनाबाट ६३ गरी ८४ थान राहदानीलगायत १ सय ८२ जनाको रेकर्ड फाइल बरामद गरेको छ।
सामाजिक सञ्जालमा वैदेशिक रोजगारीका लागि बुल्गेरिया, न्युजिल्याण्ड, रोमानिया, सर्विया, क्रोशिया, मकाउ, टर्कीलगायतका देशमा जान अवसर रहेको भनी विज्ञापन पोस्ट गरी कन्सल्टेन्सीमै बोलाइ करिब ४ सय २२ जनालाई प्रतिव्यक्ति १० देखि १४ लाखसम्म लाग्ने बताएर ठगी गरेको प्रहरीले जनाएको छ । उनीहरुले ४२२ जनाबाट करिब ३ करोडभन्दा बढी रकम उठाएको प्रहरीले जनाएको छ।
