- १५ जेष्ठ २०८३, शुक्रबार / May 29, 2026
एजेन्सी, ८ असार । इरानमाथि अमेरिका पनि युद्धमा खुलेको छ। अमेरिकी राष्ट्रपति डोनाल्ड ट्रम्पले इरानका तीन प्रमुख आणविक केन्द्रहरूमा सफल हवाई आक्रमण गरेको घोषणा गरेका छन्।
उनका अनुसार फोर्डो, नतान्ज र इस्फहानमा रहेका आणविक साइटहरूमा अमेरिकी वायुसेनाले बम आक्रमण गरेको हो। ट्रम्पले आफ्नो सामाजिक सञ्जाल ट्रुथ सोसल मा लेख्दै भनेका छन्, “हामीले इरानका तीन आणविक साइटहरूमा निकै सफल आक्रमण सम्पन्न गर्यौँ। सबै विमानहरू अहिले इरानको आकाशबाट बाहिर निस्किएका छन्।”
राष्ट्रपति ट्रम्पका अनुसार फोर्डो साइटमा ‘पूर्ण क्षमताका बमहरू’ खसालिएको छ र सबै विमानहरू अमेरिका फर्किसकेका छन्। इजरायल र इरानबीच केही सातादेखि जारी तनावकाबीच अमेरिकाले आक्रमण थालेको हो।
बीबीसीको रिपोर्ट अनुसार अमेरिकी विमानहरूले आक्रमणपछि इरानको हवाई क्षेत्र छाडिसकेका छन्। यसैक्रममा ट्रम्पले अन्तर्राष्ट्रिय समुदायलाई अब शान्तिका लागि पहलकदमी लिन आग्रह गरेका छन्। उनले इरानले युद्ध अन्त्य गर्न सहमत हुनुपर्नेमा जोड दिएका छन्।
इजरायलले गएको जुन १३ देखि इरानमा सैन्य कारबाही गर्दै आएको छ। त्यसैबीच ट्रम्पले अमेरिका इरान युद्धमा सहभागी हुने वा नहुने विषयमा चाँडै निर्णय लिने बताएका थिए। अब भने अमेरिकाको सीधा सैन्य संलग्नताले मध्यपूर्वमा स्थिति थप तनावग्रस्त बन्ने अनुमान गरिएको छ।
ट्रम्पले चाँडै राष्ट्रका नाममा सम्बोधन गर्ने तयारी गरिरहेका छन्। सम्बोधनमा आक्रमणका कारण र अमेरिकी रणनीतिको विषयमा विस्तृत जानकारी आउन सक्ने अलजजिरा ले उल्लेख गरेको छ।
