- ५ आश्विन २०८३, सोमबार / Sep 21, 2026
काठमाडौं । नेपालकै ठूलो संरक्षण क्षेत्र हो अन्नपूर्ण क्षेत्र । अन्नपूर्ण हिमालसँगै यो संरक्षण क्षेत्रको अर्को परिचय हो पर्यटकीय । पश्चिम नेपालको गण्डकी प्रदेशको उत्तरी क्षेत्रमा पर्ने नेपालको सबैभन्दा ठूलो संरक्षण क्षेत्र यसको क्षेत्रफल ७ हजार ६ सय २९ वर्ग किलोमिटर छ ।
यस संरक्षण क्षेत्रअन्तर्गत आठ हजार मिटरभन्दा अग्ला हिमालहरू, संसारको सबैभन्दा गहिरो कालीगण्डकी नदीको खोच, नेपालको सबैभन्दा बढी तथा कम पानी पर्ने ठाउँहरू पर्छन् । यो नेपालको सबैभन्दा महत्त्वपूर्ण पर्यटकीय गन्तव्यस्थल पनि हो ।
कास्की, लमजुङ, म्याग्दी, मुस्ताङ र मनाङ जिल्लामा फैलिएको छ। स्थानीयको सहयोगमा राष्ट्रिय प्रकृति संरक्षण कोषबाट व्यवस्थापन र प्रवद्र्धन गरिएको संरक्षण क्षेत्र हो । यो क्षेत्रभित्र मुख्यगरी माछापुच्छ्रे र अन्नपूर्ण हिमाल, धौलागिरि, मनाङ र मुस्ताङ उपत्यकाहरू, गुरुङ र थकाली संस्कृतिहरू, विश्वमै प्राकृतिक दृश्यको आधारमा उत्कृष्ट मानिएको अन्नपूर्ण पदमार्गलगायत छन् ।
नेपालका पहाडी तथा हिमाली क्षेत्रमा घुम्न आउने स्वदेशी तथा विदेशी पर्यटकहरूलाई अविस्मरणीय सुन्दर प्राकृतिक दृश्यहरूको दृश्यावलोकन गरेर आन्नद लिने तथा यहाँको पर्यटन उद्योगको विकासमा पनि ठूलै योगदान गरेको छ ।
यो संरक्षण क्षेत्र हिउँ चितुवा, कस्तुरी मृग, चिरु, तिब्बतीय गधा, तिब्बतीय खरायो, नाउरजस्ता विभिन्न जनावर र हिमाली वनस्पतिका लागि प्रख्यात छ । मुक्तिनाथ र दामोदर कुण्डजस्ता प्रख्यात धार्मिक क्षेत्र तथा लोमाङथाङजस्ता सांस्कृतिक धरोहर पनि यही क्षेत्रअन्तर्गत नै अवस्थित छन् ।
