बाढी पहिरोमा परी सय जनाको मृत्यु, ६७ बेपत्ता, प्रचण्डले आह्वान गरेको बैठक स्थगित

काठमाडौं । बाढीपहिरो र डुबानमा परी देरभर हालसम्म एक सय जनाको मृत्यु भएको छ । ६७ जना अझै बेपत्ता भएका छन् । विपद्मा परी सयबढी घाइते भएका छन् । ललितपुरमा २०, धादिङमा १५, काठमाडौँमा १२, काभ्रे १०, मकवानपुर सात, सिन्धुपाल्चोक छ जना, सोलुखुम्बु पाँच, पाँचथर पाँच, भक्तपुर पाँच जनाले ज्यान गुमाएका छन् ।

दोलखामा तीन, सिन्धुलीमा दुई, धनकुटा दुई, महोत्तरी दुई, रामेछाप एक, झापा एक, उदयपुर एक, इलाम एक, सप्तरी एक र नुवाकोटमा एक जनाको मृत्यु भएको गृह मन्त्रालयका प्रवक्ता ऋषिराम तिवारीले बताए । बाढीपहिरो प्रभावित क्षेत्रमा खोजी र उद्धारका लागि नौ हजार नौ सय ८३ सुरक्षाकर्मी परिचालन गरिएको तथा तीन हजार ३९ जनाको उद्धार गरिएको छ ।

प्रचण्डले आह्वान गरेको बैठक स्थगित
काठमाडौं । माओवादी केन्द्रका अध्यक्ष तथा प्रमुख प्रतिपक्षी दलका नेता पुष्पकमल दाहाल ‘प्रचण्ड’ले आह्वान गरेको सर्वदलीय बैठक स्थगित भएको छ । अविरल बर्षा, बाढी पहिरो र त्यसबाट उत्पन्न परिस्थितिबारे छलफल गर्न आज विहान १० बजे बस्ने गरी हिजो राति नै अध्यक्ष प्रचण्डले सर्वदलीय बैठकको आव्हान गरेका थिए ।